Хан-Уул дүүрэгт улсын сургууль бараг байхгүй болсон, байгаа улсын сургуулийн анги дүүргэлт хэт их зэрэг зовлон бий. Тэгвэл сургуулийн хүртээмжийг нэмэгдүүлэх, сургалтын чанарыг сайжруулах хүрээнд Хан-Уул дүүргийн 21-р хороонд байрлах Эрдэм Нова сургууль Монгол улсын анхны төр хувийн хэвшлийн төрөлжсөн ахлах сургууль үйл ажиллагаагаа эхлүүллээ.

 

Хан-Уул дүүргийн 5 сургуулийн нийт 500 гаруй ахлах ангийн сурагчид уг сургуульд зорилгоо тодорхойлсон эсээ илгээж, математик, байгалийн ухааны чиглэлээр гүнзгийрүүлэн суралцахаар болж байна.

 

Төрөлжсөн ахлах сургууль нь харьяалал үл харгалзан, цаашид мэргэшихийг хүсэж байгаа чиглэлд нь тулгуурлан академик мэдлэг, ур чадварыг эртнээс эзэмшүүлэх боломжийг бүрдүүлэх юм.

Ахлах ангийн сурагчид ерөнхий боловсролын сургуульд нийт 16 хичээлийг заавал судлах ёстой байдаг бол төрөлжсөн ахлах сургуульд суралцсанаар хүүхэд өөрийн сонгосон чиглэлийн хичээлийн агуулгыг 50 хүртэлх хувиар гүнзгийрүүлэн судлах боломжтой.

 

Их сургуулийн эхний түвшинд үздэг зарим хичээлийг ахлах ангид нь судалж, их сургуульд элсэн суралцах үедээ шаардлагатай академик суурь мэдлэг, ур чадварыг эзэмшсэн байх боломжтой юм.

Сурагч бүр 7 хоногийн сургалтын төлөвлөгөөгөө гаргаж, мэргэжлийнхээ дагуу анхан шатны оюутны программаар хичээлээ үзэх боломжууд бий болж байна.