Жүдо бөхийн 2026 оны анхны “Их дуулга” ангиллын тэмцээн Францын нийслэл Парис хотод болж, Монголын багаас ДАШТ-ий хошой хүрэл медальт, гавьяат тамирчин Л.Энхрийлэн мөнгөн медаль хүртэв.

52 дахь удаагийн тэмцээнд манай улсаас 15 тамирчин эрэгтэй дөрөв, эмэгтэй таван жинд өрсөлдсөнөөс гавьяат тамирчин Л.Энхрийлэн Монголын багийн цор ганц медалийг энгэртээ зүүлээ. Тэрбээр эхний тойрогт хийлж, дараа нь Испанийн Лаура Васкуйзыг ялж, шууд хагас шигшээд шалгарсан. Улмаар энэ удаагийн Парисын “Их дуулга”-д 63 кг-ын жингийн тамирчдыг толгойлсон Хорватын Ива Обераныг ялснаар финалдав. Гэвч алтын төлөөх барилдаанд олимпын аварга, дэлхийн хошой аварга, Бразилын Рафаэль Силвад ялагдсанаар мөнгөн медалиар энгэрээ мялааж, Парисын тэнгэрт төрийнхөө далбааг мандууллаа. Түүний хувьд Парисын “Их дуулга”-аас анх удаа медаль хүртсэн нь энэ.

Тэгвэл эмэгтэйчүүдийн 48 кг-ын жинд зодоглосон олон улсын хэмжээний мастер Г.Наранцэцэг шагналт V байр шалгарчээ. Тэрбээр Францын Моргани Аннес, Испанийн Лаура Мартениз Абиленда нарыг ялснаар хэсгийн аварга болсон. Гэвч хагас шигшээд Хятадын Венна Зуанд, хүрлийн төлөө Хятадын өөр нэг бөх Хуй Шинранд ялагдсанаар медальгүй хоцорсон юм.

Парисын “Их дуулга”-д 78 улсын оролцсоноос 21 орны жүдочид медаль хүртжээ. Багийн дүнгээр Япон 5 алт, 3 мөнгө, 6 хүрэл медальтай тэргүүлсэн бол зохион байгуулагч орон Франц 3 алт, 1 мөнгө, 5 хүрэл медаль авснаар удааллаа. Энэ удаагийн тэмцээнээс найман орон алтан медаль хүртсэн байна. Манай улсын хувьд нэг мөнгөн медаль авсан амжилтаараа 13 дугаарт жагсчээ.